रुकुम घटनाः वडाध्यक्ष सहित २३ जनालाई थुनामा पठाउन अदालतको आदेश


२०७७ असार १० रूकुम - रुकुमकाे जिल्ला अदालतले सोती मुद्दामा वडाध्यक्ष सहित २३ जनालाई पुर्पक्षका लागि थुनामा राख्न आदेश दिएको छ । जसमा एक जनालाई रु १ लाख धरौटीमा रिहा गर्न र तीन जनालाई तारेखमा छाड्न आदेश भएको रुकुम जिल्ला अदालतका स्रेस्तेदार कृतबहादुर बोहराले जानकारी दिनुभयो । बुधवार जिल्ला न्यायाधीश विद्याराज पौडेलको इजलासले वडाध्यक्ष डम्बरबहादुर मल्लसहित २३ प्रतिवादीलाई थुनामा राख्न आदेश दिएको हो ।

उहाँका अनुसार परिवर्तित नाम ५४ रुकुम-पश्चिम ३६ (२) रु एक लाख धरौटीमा रिहा भएका छन् । तुलबहादुर मल्ल, इन्द्रबहादुर मल्ल र दीपेन्द्र चन्द भने तारेखमा रिहा भएका छन । त्यस्तै प्रतिवादी तुलाराम घर्ती, सौरभ पुन, डिल्ली घर्ती, लोकेन्द्र घर्ती र भीमबहादुर बुढा फरार छन । मुद्दा पुर्पक्षका लागि थुनामा जानेमा वडाध्यक्ष मल्लसहित डिल्लीबहादुर मल्ल ठकुरी, टोपबहादुर मल्ल, परिवर्तित नाम ५४ रुकुमपश्चिम ३६(१) र परिवर्तित नाम ५४ रुकुमपश्चिम ३६ (३) छन।

त्यस्तै तिलक चन्द, हर्कबहादुर मल्ल, विनोद मल्ल, प्रेमबहादुर मल्ल ठकुरी, सन्तोष मल्ल, मानबहादुर मल्ल, नेत्रबहादुर मल्ल, रेशमबहादुर मल्ल, धनाराज राना, नवीनकुमार घर्ती मगर, बिराज पुन मगर, भीमबहादुर पुन मगर, रमित पुन मगर, सर्वजित भनिने सविन पुन र मोहन पुन मगरलाई पनि पुर्पक्षका लागि थुनामा राख्न आदेश भएको स्रेष्तेदार बोहराको भनाइ छ । उक्त मुद्दामा प्रतिवादीको बयान र थुनछेक बहस सकिएपछि आज थुनछेक आदेश जारी भएको हो । पक्राउ परेका २९ जनामध्ये दुई नाबालकलाई भने बाल सुधारगृहमा पठाउन यसअघि नै अदालतले आदेश दिइसकेको थियो ।

रूकुम प. को चौरजहारी नगरपालिका -८ सोतीमा गत जेठ १० गते भएको घटनामा जाजरकोटका पाँच र रुकुम (पश्चिम)का एक जनाको ज्यान गएको थियो । उक्त घटनामा संलग्न रहेको अभियोगमा जिल्ला सरकारी वकिल कार्यलयले ३४ जनाविरुद्ध जन्मकैद तथा आजीवन कारावास सम्म हदै सम्म को कैद सजायको माग दावी गर्दै मुद्दा दर्ता गराएको थियो ।